عدد الرسائل : 91 العمر : 35 Localisation : cairo تاريخ التسجيل : 26/08/2007
موضوع: الرخامه ادب مش هز اكتاف الجمعة أغسطس 31, 2007 6:43 pm
آه والله نفسى ابقى رخم مش بمزاجى لكن اعمل ايه اذا كان الناس ماعندهاش دم
و مشكلتى ، طبقا لاصدقائى ، انى طيب...وطيبة تصل غالبا الى درجة السذاجة....و احيانا العبط و انى ما بعرفش اقول لحد يطلب منى حاجة لأ لو انا اقدر فعلا اعملها له او اساعده فيها حتى لو ما فيش سابق معرفة بينى و بينه....بل ان بعض اصدقائى يصفونى بالطيبة الزائدة عن الحد و انى انا اللى باعود الناس منى على كده
و الناس فعلا ماعندهاش دم ولا تقدير..اى حد تعمل معاه بنط جدعنة او تأدى له خدمة مرة او مرتين , مع العلم انه علاقتك بيه مش قوية اوى يعنى و تقريبا سطحية ، تتولد عنده حالة من العشم اللامتناهى فى حضرتك و يبدأ يستغلك اسوأ استغلال وهو بيلعب على معلومة عنده بتقول ان انت خدوم و ذوق و ما بتقولش لأ لحد
و من تجربتى المتواضعة شفت نوعين من الناس النوع الاول لما تعمل معاه بنط جدعنة بيشيلها لك و يبقى عايز يخدمك بعنيه ولما يطلب منك حاجة تانية بعد كده يبقى حريص انه مايسببلكش اى تعب و لو حس للحظة انك هاتيجى على نفسك او مش هاتقدر ما يضغطش عليك ويقدر موقفك والنوع ده للاسف اقلية و مش كتير فى مجتمعنا و اما بقى النوع التانى اللى انا بعانى منه هو نوع يمتاز بمقدار عالى من التناحة والعشم اللامحدود و الثقة العالية جدا فى كرمك وطيبة اخلاقك وحرصك على علاقتك بيه ، نوع بيشوف بس انه محتاج حاجة وان الحاجة دى انت اللى ممكن تخلصها له ، لكن انت بقى تعبان ..مرتاح..رايق ولا لأ ....مش مهم
لأ و شوف حكمة ربنا يا مؤمن شوف حكمة ربنا ، ما يفتكركش ولا يسأل عليك الا اذا كان عايز منك حاجة ، و سبحان من جمعنا من غير ميعاد على التليفون ، وممكن جدا يبقى لسه طالب منك حاجة امبارح ولسه هايطلب حاجة بكرة ، مش مشكلة عنده ، ما انت خلاص بقيت الراجل بتاعه....انت معوده على كده
وتعالى بقى لو مرة صدمته و جرحته و قلتله لأ او مش فاضى ، ساعتها ينسى كل المواقف اللى انت عملتها معاه و تبقى سيادتك بتتنطط عليه و تسمع بقى عبارات من نوع الله الغنى(وطبعا الله الغنى عن كل شىء) و اللى عطاك يعطينا ياعم و ولا علشان ماحدش غيرك ياعنى اللى بيعرف يعملها و هكذا يمسح كل اللى عملته معاه بأستيكة و ينتقل للهجوم عليك و مش بعيد يسيحلك عند ناس تانية و طبعا بعد فترة بيبدأ حبايبك و جماهيرك يزيدوا و يشكلوا ضغط على اعصاب سيادتك
وهكذا صحييت النهاردة الصبح وقررت ان كفاية جدعنة لحد كده....اجرب الرخامة شوية من نفسى، و اشوف ايه اللى ممكن يحصل
بعض اصدقائى الانتيخ نصحونى و قالولى ان الناس تحب اللى يتنطط عليها و يحور لها و يوهمها انه بذل مجهود جبار لاداء خدمة معينة ممكن تكون سهلة جدا و فى نفس الوقت يكون صعب المنال...يعنى ماحدش يطلب منك مثلا ثلاث طلبات ورا بعض فتتجن فى عقلك و تنفذهم له كلهم ، نفذ واحد و اتمنع اثنيين بصرف النظر الطلب ده فى متناول ايدك ولا لأ ، ساعتها اللى بيطلب هايفكر مرتين قبل ما يرمى جتته عليك تانى و فى نفس الوقت تكون ماخسرتوش ، ماهو برضه ممكن تحتاجه فى حاجة بعد كده
كان ليه واحد صاحبى ايام الكلية ليه مقولة مشهورة دايما على لسانه وهى عيش ندل... تموت مستور وانا مش هاوصلها للندالة بس فعلا هاجرب ابقى رخم و لو اسبوع واشوف ايه اللى هايحصل